ముసలోడే కానీ మహానుభావుడు.. స్కూటీలోనే దుకాణమెట్టేశాడు.. పోలీసులే షాక్!

Old man Transports 100 liquor bottles in Scooty: తాడిని తన్నేవాడుంటే వాడి తలను తన్నేవాడు ఇంకొకడు ఉంటాడనేది పెద్దలు చెప్పే మాట. మనమే పెద్ద తోపులం అనుకుంటే మనకు మించిన తోపులు ఉంటారని దాని అర్థం. ఇప్పుడీ విషయం ఎందుకంటే రాంగ్ రూట్లో అక్రమాలకు పాల్పడే వ్యక్తులు.. తామే పెద్ద మేధావులం అనే భ్రమతో ఏవేవో ప్లాన్లు వేస్తుంటారు. తీరా పోలీసుల దగ్గరకు వచ్చేసరికి ప్లాన్ రివర్స్ అవుతూ ఉంటుంది. మైండ్ బ్లాక్ అవుతుంటుంది. అలాంటి ఘటనే తాజాగా ఆంధ్రప్రదేశ్‌లోని ఎన్టీఆర్ జిల్లాలో చోటుచేసుకుంది.

ఎన్టీఆర్ జిల్లా నందిగామకు చెందిన గోపయ్య అనే వృద్ధుడు తెలంగాణ నుంచి అక్రమంగా మద్యం తరలిస్తూ పోలీసులకు పట్టుబడ్డాడు. గత కొంతకాలంగా ఇదే వ్యాపారంగా మార్చుకున్న గోపయ్య.. అక్రమ మార్గంలో తెలంగాణ నుంచి ఏపీకి మద్యం తరలించేవాడు. ఇక్కడ విక్రయించి సొమ్ము చేసుకునేవాడు. ఈ క్రమంలోనే ఇటీవల కూడా గోపయ్య ఓ ప్లాన్ వేశాడు. తన స్కూటర్‌నే ఇందుకు సాధనంగా మార్చుకున్నాడు. స్కూటిలో మద్యం బాటిళ్లను దాచి అక్రమంగా ఏపీకి తరలించే పని స్టార్ట్ చేశాడు.

అయితే స్కూటీ డిక్కీలో దాచితే పోలీసులకు దొరికిపోతామనే ఉద్దేశంతో గోపయ్య.. ఓ కన్నింగ్ ఐడియా వేశాడు. హ్యాండిల్ కింది భాగంలో.. బండి పార్ట్స్ ఓపెన్ చేసి అందులో మద్యం బాటిళ్లను దాచి కోదాడ నుంచి ఏపీకి తరలించే ప్రయత్నం చేశాడు. ఒకటీ రెండు కాదు ఏకంగా వంద క్వార్టర్ బాటిళ్లను స్కూటీ ముందుభాగంలో దాచి కోదాడ నుంచి తీసుకువస్తూ నందిగామ పోలీసులకు చిక్కాడు. ఎన్నికల కోడ్ అమల్లో ఉన్న నేపథ్యంలో నందిగామలో పోలీసులు తనిఖీలు నిర్వహించారు. ఈ తనిఖీల్లో గోపయ్య తీరుపై అనుమానపడిన పోలీసులు.. స్కూటీ మొత్తం క్షుణ్ణంగా చెక్ చేయగా.. అసలు బాగోతం బయటపడింది.

గోపయ్య ప్లాన్ చూసి పోలీసులు సైతం షాక్ తిన్నారు. ఆ తర్వాత స్కూటీలో నుంచి 100 క్వార్టర్ల తెలంగాణ మద్యం సీసాలను స్వాధీనం చేసుకున్నారు. గోపయ్య మీద కేసు నమోదుచేశారు. ఆ రకంగా ఎవరికీ చిక్కను అనుకుని కన్నింగ్ ప్లాన్ వేసిన గోపయ్య.. అనుకోని రీతిలో పోలీసులకు చిక్కి..చిక్కుల్లో పడ్డాడు.

ఇటువంటి మరిన్ని వార్తలు సమయం తెలుగులో చదవండి. లేటెస్ట్ వార్తలు, సిటీ వార్తలు, జాతీయ వార్తలు, బిజినెస్ వార్తలు, క్రీడా వార్తలు, రాశిఫలాలు ఇంకా లైఫ్‌స్టైల్ అప్‌డేట్లు మొదలగునవి తెలుసుకోండి. వీడియోలను TimesXP లో చూడండి.

2024-05-03T10:20:30Z dg43tfdfdgfd