51 ఏళ్ల వయసులో తండ్రైన ముఖ్యమంత్రి.. ఆడపిల్లకు జన్మనిచ్చిన సీఎం భార్య
పంజాబ్ ముఖ్యమంత్రి భగవంత్ మాన్ దంపతులకు పండంటి ఆడపిల్ల పుట్టింది. గురువారం ఉదయం ఆయన భార్య డాక్టర్ గురుప్రీత్ కౌర్ పాపకు జన్మనిచ్చింది. ఈ విషయాన్ని సీఎం భగవంత్ మాన్ ఎక్స్ (ట్విట్టర్)లో తెలియజేశారు. మొహాలీలోని ఫోర్టిస్ ఆస్పత్రిలో గురుప్రీత్ ప్రసవం జరిగినట్టు తెలిపారు. ప్రస్తుతం తల్లీబిడ్డ ఆరోగ్యంగా ఉన్నారని ఆస్పత్రి వైద్యులు వెల్లడించారు. ఇదిలా ఉండగే, పంజాబ్ పునర్వ్యవస్థీకరణ చరిత్రలో పదవిలో ఉండగానే తండ్రి అయిన తొలి ముఖ్యమంత్రి భగవంత్ మాన్. ఆయన వయసు 51 ఏళ్లు. రెండేళ్ల కిందట గురుప్రీత్‌ను మాన్ వివాహం చేసుకున్నారు. మొదటి భార్యతో ఆయనకు ఇద్దరు పిల్లలు ఉన్నారు. ప్రస్తుతం వారు కెనడాలో స్థిరపడ్డారు. మొదటి భార్యతో మాన్ విడాకులు తీసుకున్నారు.
భగవంత్ మాన్ సింగ్‌కు ఇంతకు ముందు ఇందర్‌ప్రీత్ కౌర్‌తో పెళ్లయింది. 2014లో ఆయన ఎంపీగా పోటీ చేసినప్పుడు ఎన్నికల ప్రచారంలో ఆమె పాల్గొన్నారు. అయితే వీరి వైవాహిక బంధం ఆరేళ్లపాటు సాగింది. విబేధాలు కారణంగా విడాకులు తీసుకున్నారు. తర్వాత 2022 జులైలో కురుక్షేత్రలోని పెహ్వాకు చెందిన గురుప్రీత్ కౌర్‌ను వివాహం చేసుకున్నారు.
భగవంత్ మాన్ మొదట హాస్యనటుడిగా కెరీర్‌ను మొదలుపెట్టారు. రాజకీయాల్లోకి చేరడానికి ముందు నటుడిగా మంచి గుర్తింపు తెచ్చుకున్నారు. 2022 పంజాబ్ ఎన్నికల్లో ఆప్ విజయం సాధించడంతో ముఖ్యమంత్రి‌గా మార్చిలో బాధ్యతలు చేపట్టారు. అంతకుముందు పంజాబ్‌లోని సంగ్రూర్ నియోజకవర్గం నుండి లోక్‌సభ నుండి రెండు సార్లు పార్లమెంటుకు ఎన్నికయ్యారు.
కాగా, గతేడాది డిసెంబరులో భగవంత్ మాన్ కుమార్తె సీరత్ వీడియో ఒకటి వైరల్ అయ్యింది. ఆయనపై తీవ్ర విమర్శలు చేసిన సీరత్.. తాను సీఎం భగవంత్ మాన్ కుమార్తెనని, అయితే పాపా అని పిలిచే హక్కును చాలాకాలంగా కోల్పోయినందుకు అతన్ని సిఎం మాన్‌గా పిలుస్తున్నట్లు చెప్పింది.
గురుప్రీత్ గర్భవతి అయిన విషయం గురించి కూడా మాట్లాడింది. ‘నీకు ఇద్దరు పిల్లలు ఉన్నారు. కానీ వాళ్ళని నిర్లక్ష్యం చేసి ఇప్పుడు మూడోవాడిని ఈ ప్రపంచంలోకి తీసుకురావాలనుకుంటున్నావు. దీనికి కారణం ఏంటి?’ అని ప్రశ్నించింది. తన సోదరుడు దోషన్ తండ్రిని కలవడానికి రెండుసార్లు పంజాబ్ వస్తే.. బయటకు గెంటేశారని ఆరోపించింది.
ఇటువంటి మరిన్ని వార్తలు సమయం తెలుగులో చదవండి. లేటెస్ట్ వార్తలు, సిటీ వార్తలు, జాతీయ వార్తలు, బిజినెస్ వార్తలు, క్రీడా వార్తలు, రాశిఫలాలు ఇంకా లైఫ్‌స్టైల్ అప్‌డేట్లు మొదలగునవి తెలుసుకోండి. వీడియోలను TimesXP లో చూడండి. 2024-03-28T08:05:15Z dg43tfdfdgfd