GODREJ: తాళాల నుంచి అంతరిక్షం వరకు.. భారతీయుల నమ్మకాన్ని గెలుచుకున్న గోద్రెజ్

Godrej: గోద్రెజ్ అంటే తెలియని వారు ఉండరనే చెప్పాలి. ఎందుకంటే భారతీయుల జీవితాల్లో గోద్రెజ్ ఒక భాగమైపోయింది. తాళాలు తయారు చేసే కంపెనీగా ప్రారంభమై అంచెలంచెలుగా ఎదుగుతూ విభిన్న వ్యాపారం రంగాల్లోకి ప్రవేశించింది. ప్రజలకు అవసరమైన ఉత్పత్తులను అందిస్తూ వారికి మరింత చేరువైంది. మేకిన్ ఇండియా నినాదాన్ని అందిపుచ్చుకున్న తొలి కంపెనీ ఇదే. తాళాలు, సబ్బులు, గృహోపకరణాలు, స్థిరాస్తి రంగాలతో పాటు చంద్రయాన్, మంగళయాన్ మిషన్లలోనూ పాలుపంచుకుంది. 127 ఏళ్ల ఘన చరిత్ర కలిగిన సంస్థ గోద్రెజ్. ఇంతటి ఘన చరిత్ర గల ఈ కంపెనీ రెండుగా విడిపోయింది. వారసులు ఈ సంస్థను పంచుకోవడానికి ఓ ఒప్పందానికి వచ్చారు.

గోద్రెజ్ కంపెనీకి మూల పురుషుడు ఆర్దేశిర్ గోద్రెజ్. తాళం అంటే గోద్రెజ్, గోద్రెజ్ అంటే తాళాలు అనేలా మార్చేసిన ఘనత ఆయనది. వృత్తి రీత్యా లాయర్ అయిన ఆర్దేశిర్ గోద్రెజ్ 1897లో ఈ కంపెనీ మొదలు పెట్టారు. తన స్నేహితుడి తండ్రి వద్ద కొంత మొత్తాన్ని అప్పుగా తీసుకుని తొలుత సర్జికల్ టూల్స్ తయారు చేసేవారు. ఆ వ్యాపారం విఫలమవడంతో తాళాల తయారీని ప్రారంభించారు. ఆ తర్వాత వెనుదిరిగి చూడలేదు. 1907లో తొలి స్ప్రింగ్ లెస్ లాక్ తయారు చేసి పేటెంట్ కూడా పొందారు. 1914లో బీరువాల తయారీలోకి గోద్రెజ్ ప్రవేశించింది. వందేళ్లుగా తాళాల తయారీలో ఉన్న కంపెనీ.. ఇప్పటికీ తాళాలు తయారు చేస్తూనే ఉంది. ఎప్పటికప్పుడు ఆధునికతను అందిపుచ్చుకుంటూ స్మార్ట్ లాక్స్ రూపొందిస్తోంది.

ప్రపంచంలోనే తొలి వెజిటబుల్ ఆయిల్ సబ్బును తయారు చేసింది గోద్రెజ్ కంపెనీ కావడం గమనార్హం. అప్పటి వరకు జంతువుల కొవ్వుతో సబ్బులు తయారు చేసే వారు. చాబీ అనే పేరుతో దీన్ని విక్రయించేవారు. స్వదేశీ, అహింసా ప్రాధాన్యంగా తయారైన సబ్బుగా నిలిచింది. ఈ సబ్బుల ప్రకటనలో అప్పట్లో రవీంద్రనాథ్ ఠాగూర్ కనిపించేవారు. అనిబిసెంట్, మహాత్మా గాంధీ వంటి ప్రముఖులు కూడా ఈ సబ్బును వాడడాన్ని ప్రోత్సహించేవారు. దేశీయ తొలి టైప్ రైటర్ తయారు చేసిన కంపెనీ సైతం గోద్రెజే. దానికి అప్పట్లో గోద్రెజ్ ప్రైమా అని పేరు పెట్టారు. కోర్టులు, ప్రభుత్వ ఆఫీసుల్లో ఈ టైప్ రైటర్లే ఉండేవి. దేశంలో స్వాతంత్య్రం వచ్చాక జరిగిన తొలి ఎన్నికల్లో వాడిన బ్యాలెట్ బాక్సులు కూడా ఈ కంపెనీవే. సుమారు 17 లక్షల బ్యాలెట్ బాక్సులను ఈ కంపెనీ తయారు చేసింది.

మంగళయాన్, చంద్రయాన్ లాంటి అంతరిక్ష ప్రయోగాల్లో గోద్రెజ్ పాలుపంచుకుంది. చంద్రయాన్ 3 మిషన్ కోసం ఇండియన్ స్పేస్ రీసర్చ్ ఆర్గనైజేషన్ (ఇస్రో)కు అవసరమైన పరికరాలను ముంబైకి చెందిన ప్రైవేట్ ఏరోస్పేస్ కంపెనీ గోద్రెజ్ ఏరోస్పేస్ సరఫరా చేసింది. లాంచ్ వెహికల్, లూనార్ ఆర్బిట్ తయారీకి తోడ్పడింది. చంద్రాయన్ 1, 2, మంగళయాన్ ప్రయోగాలకు సైతం ఈ సంస్థ కీలక ఉత్పత్తులను అందించింది.

ఆర్దేశిర్ గోద్రెజ్, ఆయన సోదరుడు పిరోజ్ షా కలిసి ఈ కంపెనీ స్థాపించారు. ఆర్దేశిర్ కు పిల్లలు లేరు. పిరోజ్ కు వారసులు సౌహ్రబ్, దోసా, బుర్జోర్, నావల్ ఉన్నారు. బుర్జోర్ (ఆది, నదిర్), నావల్ (జెంషెడ్, స్మిత) ఉన్నారు. వారే ఇప్పుడు కంపెనీని నడుపుతున్నారు. వ్యాపార విభజనలో భాగంగా ఆది గోద్రెజ్, ఆయన సోదరడు నదిర్ 5 నమోదిత కంపెనీలు ఉన్న గోద్రెజ్ ఇండస్ట్రీస్ తీసుకుంటున్నారు. ఇక జెంషెడ్ గోద్రెజ్, స్మితా గోద్రెజ్ క్రిష్ణలు అన్‌లిస్టెడ్ గోద్రెజ్ అండ్ బోయ్స్ తో పాటు వాటి అనుబంధ కంపెనీలు, ముంబైలోని 3400 ఎకరాల భూమి తీసుకుంటున్నారు.

ఇటువంటి మరిన్ని వార్తలు సమయం తెలుగులో చదవండి. లేటెస్ట్ వార్తలు, సిటీ వార్తలు, జాతీయ వార్తలు, బిజినెస్ వార్తలు, క్రీడా వార్తలు, రాశిఫలాలు ఇంకా లైఫ్‌స్టైల్ అప్‌డేట్లు మొదలగునవి తెలుసుకోండి. వీడియోలను TimesXP లో చూడండి.

2024-05-02T02:05:48Z dg43tfdfdgfd