TSPSC GROUP 1 : తెలంగాణ గ్రూప్‌-1 అభ్యర్థులకు అలర్ట్‌.. ప్రిలిమ్స్‌ వాయిదాకు నో ఛాన్స్‌..!

TSPSC Group 1 Exam 2024 : తెలంగాణలో గ్రూప్-1 అభ్యర్థులకు అలర్ట్‌. టీఎస్‌పీఎస్సీ గ్రూప్‌-1 ప్రిలిమినరీ పరీక్షను మొదట నిర్ణయించిన షెడ్యూల్‌ ప్రకారమే నిర్వహించనున్నట్లు తెలుస్తోంది. ఈ మేరకు టీఎస్‌పీఎస్సీ ఏర్పాట్లు చేస్తున్నట్లు సమాచారం. ఇప్పటికే గ్రూప్-1 ప్రిలిమినరీ పరీక్ష తేదీని టీఎస్‌పీఎస్సీ ప్రకటించిన సంగతి తెలిసిందే. 2024 జూన్ 9న ప్రిలిమ్స్ పరీక్ష నిర్వహించనున్నట్లు కమిషన్‌ ప్రకటించింది. ఇక.. ఈ పరీక్షకు సంబంధించిన హాల్‌టికెట్లు కూడా మే నెలాఖరులోగా విడుదల చేసే విధంగా ప్రణాళిక రూపొందిస్తున్నట్లు తెలుస్తోంది.

ఇప్పటికే టీఎస్‌పీఎస్సీ గ్రూప్-1 ప్రిలిమ్స్ పరీక్షకు సంబంధించిన ప్రశ్నపత్రాల రూపకల్పన, తర్జుమా చేయడం, పరీక్షా కేంద్రాల గుర్తింపు వంటి పనులు ప్రారంభించినట్లు తెలుస్తోంది. ఇదంతా చూస్తుంటే టీఎస్‌పీఎస్సీ కమిషన్‌ గ్రూప్‌-1 పరీక్షను వాయిదా వేసే ఉద్దేశం లేదనే విషయం అర్థం చేసుకోవచ్చు. అభ్యర్థులు కూడా 2024 జూన్ 9న ప్రిలిమ్స్ పరీక్షతేదీని దృష్టిలో ఉంచుకుని సన్నద్ధమవడం మంచిది. తెలంగాణలో 563 గ్రూప్-1 పోస్టుల భర్తీకి తెలంగాణ రాష్ట్ర పబ్లిక్ సర్వీస్ కమిషన్ (TSPSC) ఫిబ్రవరి 19వ తేదీన నోటిఫికేషన్ విడుదల చేసిన సంగతి తెలిసిందే. డిగ్రీ అర్హత ఉన్న అభ్యర్థుల నుంచి ఫిబ్రవరి 23 నుంచి మార్చి 16 వరకు దరఖాస్తులు స్వీకరించారు. మొత్తం 4.03 లక్షల మంది అభ్యర్థులు దరఖాస్తు చేసుకున్నారు. మార్చి 23 నుంచి 27 వరకు దరఖాస్తుల సవరణకు అవకాశం కల్పించారు.

TSPSC Group 1 పరీక్ష విధానం:

టీఎస్‌పీఎస్సీ గ్రూప్‌-1 పరీక్ష మొత్తం 150 మార్కులకు ప్రిలిమ్స్ పరీక్ష (జనరల్ స్టడీస్ అండ్‌ మెంటల్ ఎబిలిటీ), 900 మార్కులకు మెయిన్ (6 పేపర్లు) పరీక్షలు నిర్వహిస్తారు. ఒక్కో పేపరుకు 150 మార్కులు ఉంటాయి. ఇక మెయిన్ పరీక్షలో 150 మార్కులకు జనరల్ ఇంగ్లిష్ అర్హత పరీక్ష నిర్వహిస్తారు.

TSPSC Group 1 ప్రిలిమ్స్‌ కేంద్రాలివే:

ఆసిఫాబాద్-కొమ్రంభీమ్, మంచిర్యాల, పెద్దపల్లి, జయశంకర్ భూపాలపల్లి, ములుగు, ఆదిలాబాద్, నిర్మల్, నిజామాబాద్, జగిత్యాల, కరీంనగర్, సిరిసిల్ల-రాజన్న, సిద్ధిపేట, మెదక్, కామారెడ్డి, భద్రాద్రి కొత్తగూడెం, ఖమ్మం, మహబూబాబాద్, వరంగల్, హనుమకొండ, సూర్యాపేట, నల్గొండ, భువనగిరి-యాదాద్రి, జనగాం, మేడ్చల్-మల్కాజ్‌గిరి, హైదరాబాద్, రంగారెడ్డి, సంగారెడ్డి, వికారాబాద్, మహబూబ్‌నగర్, నారాయణపేట, జోగుళాంబ-గద్వాల్, వనపర్తి, నాగర్‌కర్నూల్ జిల్లాలో పరీక్ష నిర్వహిస్తారు.

ఇటువంటి మరిన్ని వార్తలు సమయం తెలుగులో చదవండి. లేటెస్ట్ వార్తలు, సిటీ వార్తలు, జాతీయ వార్తలు, బిజినెస్ వార్తలు, క్రీడా వార్తలు, రాశిఫలాలు ఇంకా లైఫ్‌స్టైల్ అప్‌డేట్లు మొదలగునవి తెలుసుకోండి. వీడియోలను TimesXP లో చూడండి.

2024-04-23T10:50:01Z dg43tfdfdgfd