పిల్లలతో వెళ్లే విమాన ప్రయాణికులకు శుభవార్త.. DGCA కీలక నిర్ణయం.. ఇక పక్కనే సీటు!

DGCA: నిత్యం లక్షల మంది విమాన ప్రయాణాలు చేస్తుంటారు. చాలా మంది చిన్న పిల్లలతో జర్నీ చేస్తుంటారు. ఈ వేసవి కాలంలో వివిధ టూర్లకు వెళ్లేవారు ఎక్కువగా పిల్లలను తీసుకెళ్తుంటారు. అలాంటి వారందరికీ డైరెక్టరేట్ జనరల్ ఆఫ్ సివిల్ ఏవియేషన్ (డీజీసీఏ) శుభవార్త అందించింది. విమానయాన సంస్థలకు కీలక ఆదేశాలు జారీ చేసింది. 12 ఏళ్ల లోపు వయసు ఉన్న చిన్నారులకు అదే పీఎన్ఆర్ నంబర్‌పై ప్రయాణిస్తున్న తల్లిదండ్రులు లేదా సంరక్షకుల్లో ఒకరి పక్కనే సీటు కేటాయించాలని సూచించింది. విమానాల్లో కొన్ని సందర్భాల్లో చిన్న పిల్లలకు తల్లిదండ్రులతో కాకుండా వేరుగా సీటు కేటాయిస్తుండడంతో సమస్యలు ఎదురవుతున్న నేపథ్యంలో డీజీసీఏ ఈ నిర్ణయం తీసుకుంది.

తల్లిదండ్రులు లేదా సంరక్షకుల్లో ఒకరి పక్కన సీటు కేటాయించడంతో పాటు పిల్లలకు సీటు కేటాయింపులకు సంబంధించిన రికార్డులను సైతం నిర్వహించాలని సూచించింది డీజీసీఏ. ఈ మేరకు విమానయాన నిబంధనలు సవరిస్తూ ఎయిర్ ట్రాన్స్‌పోర్ట్ సర్క్యూలర్ 01 2024 జారీ చేసింది. అలాగే విమాన సంస్థలకుసంబంధించి కొన్ని వెసులు బాట్లు కల్పించింది. జీరో బ్యాకేజీ, సీట్ల ప్రాధాన్యం, మీల్స్, స్నాక్స్, డ్రింక్స్, సంగీత వాయిద్య పరికరాలు తీసుకెళ్లేందుకు ఫీజులు వసూలు చేసుకోవచ్చని పేర్కొంది. అయితే, అది తప్పనిసరి చేయకూడదని, ప్రయాణికులు వాలంటరీగా ఇచ్చేలా ఉండాలని సూచించింది.

సాధారణంగా చూస్తే విమానాల్లో వెబ్ చెక్ ఇన్ ఆప్షన్ ఉంటుంది. ఆ టైంలో నచ్చిన సీటును ప్రయాణికుడు ఎంచుకునే అవకాశం ఉంటుంది. ఒక వేళ ప్రయాణికుడు ఏ సీటూ ఎంచుకోకపోతే వారికి ఆటో సీట్ అసైన్మెంట్ నిబంధన వర్తిస్తుంది. సీటు ఎంపిక చేసుకున్న వారు కొంత అదనంగా ఛార్జీలు చెల్లించాల్సి వస్తుంది. అయినప్పటికీ తమకు నచ్చిన సీటును ఎంచుకోవచ్చు. ఇద్దరు అంతకన్నా ఎక్కువ మంది ఒకే కుటుంబానికి చెందిన వారు లేదా స్నేహితులు కలిసి వెళ్తున్నప్పుడు వారు సీటు ఎంపిక చేసుకోకపోయిన సందర్భంలో ఇబ్బందులు తలెత్తుతున్నాయి. గ్రూప్ సభ్యుల్లోని వారికి పక్కపక్కనే సీట్లు రావడం లేదు. దీంతో ప్రయాణికులు గోడవలకు దిగుతున్న సందర్భాలూ ఇటీవల వెలుగులోకి వచ్చాయి. ఈ క్రమంలోనే చిన్న పిల్లలకు తప్పనిసరిగా వారి తల్లిదండ్రుల పన్ను సీటు కేటాయించాలని డీజీసీఏ ఆదేశించింది.

ఇటువంటి మరిన్ని వార్తలు సమయం తెలుగులో చదవండి. లేటెస్ట్ వార్తలు, సిటీ వార్తలు, జాతీయ వార్తలు, బిజినెస్ వార్తలు, క్రీడా వార్తలు, రాశిఫలాలు ఇంకా లైఫ్‌స్టైల్ అప్‌డేట్లు మొదలగునవి తెలుసుకోండి. వీడియోలను TimesXP లో చూడండి.

2024-04-23T10:31:57Z dg43tfdfdgfd