దారుణం.. భార్య ఆస్పత్రి ఖర్చులు భరించలేక ఐసీయూలోనే చంపేసిన భర్త

కట్టుకున్న భార్య ఆస్పత్రిలో పడి ఉంది. సాధారణంగా ఏ భర్త అయినా ఏం చేస్తారు. తన జీవిత భాగస్వామికి అన్ని సపర్యలు చేస్తూ.. కంటికి రెప్పలా కాపాడుకుంటారు. మంచి ట్రీట్‌మెంట్ కోసం ఉన్న డబ్బు అంతా ఖర్చు చేస్తారు. డబ్బు లేకపోతే అప్పు చేసి అయినా.. లేక బంగారం, ఆస్తులు అమ్మి అయినా చివరికి ప్రాణాలు కాపాడుకునేందుకు ప్రయత్నిస్తూ ఉంటారు. భార్యను చిన్న పిల్లలా చూసుకుంటూ అన్ని రకాలుగా అండగా ఉంటారు. కానీ ఓ క్రూరుడు మాత్రం.. అనారోగ్యంతో ఆస్పత్రి పాలైన భార్యను.. ఆస్పత్రిలోనే కడతేర్చాడు. అందుకు కారణం.. ఆమె చికిత్సకు అయిన మెడికల్ బిల్లులను కట్టలేక అదే ఆస్పత్రి ఐసీయూలో భార్యను ఓ భర్త హతమార్చిన సంఘటన తీవ్ర సంచలనంగా మారింది.

అయితే ఈ సంఘటన అమెరికాలో చోటు చేసుకుంది. మిస్సోరిలోని ఇండిపెండెన్స్‌లో ఉన్న సెంటర్ పాయింట్ మెడికల్ సెంటర్‌లో ఈ సంఘటన చోటు చేసుకుంది. రోన్నీ విగ్స్ అనే వ్యక్తి.. అనారోగ్యంతో ఉన్న తన భార్యను ఆస్పత్రికి తీసుకువచ్చాడు. ఆమెకు ఐసీయూలో చికిత్స అందించారు. దీంతో ఆమె మెడికల్ బిల్లులు భారీగా పెరిగిపోయాయి. ఆ వైద్య ఖర్చులు భరించలేని రోన్నీ విగ్స్‌కు ఏం చేయాలో తోచలేదు. దీంతో ఆమెను చంపాలని నిర్ణయించుకున్నాడు. ఐసీయూలో ఉన్న తన భార్య గొంతు కోసి హతమార్చాడు. శుక్రవారం రాత్రి 11:30 గంటల ప్రాంతంలో ఈ సంఘటన జరిగింది.

ఐసీయూలో ఉన్న ఓ మహిళా రోగిపై దాడి జరిగినట్లు సిబ్బంది గుర్తించి.. పోలీసులకు సమాచారం అందించారు. రంగంలోకి దిగిన పోలీసులు సంఘటనపై ఆరా తీశారు. చివరికి ఆమె భర్త రోన్నీ విగ్స్‌ను విచారణ జరిపారు. అయితే రోన్నీ విగ్స్.. తన భార్యను చంపినట్లు పోలీసుల ముందు అంగీకరించాడు. ఈ విషయాన్ని రోన్నీ విగ్స్ ఒప్పుకోవడం ఆ ఆస్పత్రిలో పనిచేసే సిబ్బంది విన్నారు. తన భార్య ఆస్పత్రిలోని ఐసీయూ బెడ్‌పై ఉండగా.. రోన్నీ విగ్స్.. ఆమె నోరు, ముక్కును మూసి ఊపిరి ఆడకుండా చేశాడు. ఆ తర్వాత గొంతు కోసి చంపేశాడు.

పోలీసులు వచ్చి ఆ మహిళను పరిశీలించగా.. చనిపోయినట్లు గుర్తించారు. దీంతో పోలీసులు రోన్నీ విగ్స్‌ను అరెస్ట్ చేసి కస్టడీలోకి తీసుకున్నారు. తన ఆర్థిక పరిస్థితి చాలా దారుణంగా ఉందని.. తన భార్య ఆస్పత్రి ఖర్చులు భరించే స్తోమత తనకు లేదని అందుకే ఆమెను చంపాలని నిర్ణయించుకున్నట్లు అంగీకరించాడు. అయితే గతంలో కూడా ఆమె రెండుసార్లు చంపడానికి ప్రయత్నించినట్లు రోన్నీ విగ్స్ ఒప్పుకున్నాడు.

ఇటువంటి మరిన్ని వార్తలు సమయం తెలుగులో చదవండి. లేటెస్ట్ వార్తలు, సిటీ వార్తలు, జాతీయ వార్తలు, బిజినెస్ వార్తలు, క్రీడా వార్తలు, రాశిఫలాలు ఇంకా లైఫ్‌స్టైల్ అప్‌డేట్లు మొదలగునవి తెలుసుకోండి. వీడియోలను TimesXP లో చూడండి.

2024-05-07T12:45:57Z dg43tfdfdgfd