రాజ్యాంగంపై దాడి చేసిందే కాంగ్రెస్ : కిషన్ రెడ్డి
రాజ్యాంగంపై దాడి చేసిందే కాంగ్రెస్ : కిషన్ రెడ్డి
- అంబేద్కర్ను ఆ పార్టీ ఎన్నోసార్లు అవమానించింది
- అమిత్ షాపై ఫేక్ వీడియో కేసులో తొలి నిందితుడు రేవంతేనని కామెంట్
హైదరాబాద్, వెలుగు: దేశానికి స్వాతంత్ర్యం వచ్చినప్పటి నుంచి రాజ్యాంగంపై కాంగ్రెస్ పార్టీ ఎన్నోసార్లు దాడి చేసిందని కేంద్ర మంత్రి, బీజేపీ రాష్ట్ర అధ్యక్షుడు కిషన్రెడ్డి ఆరోపించారు. రాజ్యాంగాన్ని రాసిన అంబేద్కర్ను సైతం ఆ పార్టీ చాలాసార్లు అవమానించిందని చెప్పారు. సామాజిక న్యాయం చేయాలన్న ఆలోచనే కాంగ్రెస్కు లేదని ఆరోపించారు. ఎంపీఎన్నికల్లో కాంగ్రెస్ పార్టీ బీసీలకు ఎన్ని సీట్లు ఇచ్చిందో చెప్పాలని డిమాండ్ చేశారు. వారం రోజుల నుంచి సీఎం రేవంత్ రెడ్డి అహంకారపూరితంగా మాట్లాడుతున్నారని.. అతని నిజస్వరూపాన్ని రాష్ట్ర ప్రజలందరూ తెలుసుకుంటున్నారన్నారు.
బుధవారం బీజేపీ స్టేట్ ఆఫీసులో కిషన్ రెడ్డి సమక్షంలో వరంగల్ తూర్పు నియోజకవర్గానికి చెందిన బీఆర్ఎస్ కార్పొరేటర్ కల్పన తదితరులు బీజేపీలో చేరారు. ఈ సందర్భంగా కిషన్ రెడ్డి మాట్లాడారు. ఎన్నికల వేళ రేవంత్ రెడ్డి తలపై గాడిదగుడ్డు పెట్టుకుని ఊరేగుతున్నారని విమర్శించారు. ‘‘5 నెలల పాలనలో తాను ప్రజలకిచ్చింది ఇదేనంటూ గాడిద గుడ్లు తలపై పెట్టుకుని ప్రజలకు వివరిస్తున్నారు.
ఎన్నికలకు వెళ్లేటప్పుడు ఏ పార్టీ అయినా ప్రజలకు చేసిన, చేయాల్సిన పనులను వివరిస్తుంది. కానీ, కాంగ్రెస్ ఇచ్చిన ఆరు గ్యారంటీలను గాలికొదిలేసింది. ఆగస్టు 15న రుణమాఫీ అంటూ ఊదరగొడుతున్నది. లోక్సభ ఎన్నికల్లో కాంగ్రెస్ ప్రభావం కనిపించడం లేదు. దీంతో 14 సీట్లు గెలుస్తామన్న సీఎం రేవంత్ రెడ్డి.. ఇప్పుడు తన కాళ్లకింద భూమి కదిలిపోతుంటే ఏమీచేయలేని స్థితిలో రోజుకో విధంగా మాట్లాడుతున్నారు. రాజ్యాంగం మారుస్తారంటూ దుష్ప్రచారం చేశారు’’ అని కిషన్రెడ్డి ఆరోపించారు.
ఫేక్ వీడియో బాధ్యత రేవంత్దే
రిజర్వేషన్లు రద్దు చేస్తారంటూ ఫేక్ వీడియోలు సృష్టించింది కాంగ్రెస్ పార్టీయేనని కిషన్రెడ్డి అన్నారు. దానికి పూర్తి బాధ్యత రేవంత్దేనని, ఈ విషయంలో మొదటి నిందితుడు ఆయనేనని పేర్కొన్నారు. మార్ఫింగ్ వీడియోలు సృష్టించిన వారు జైలు ఊచలు లెక్కపెట్టక తప్పదని హెచ్చరించారు. రాష్ట్రంలో మోదీకి, బీజేపీకి పెరుగుతున్న ఆదరణను చూసి తట్టుకోలేక మార్ఫింగ్ వీడియోలతో బురదజల్లుతున్నారని ఆరోపించారు. లోక్సభ ఎన్నికల్లో తెలంగాణ గడ్డపై కాంగ్రెస్, బీఆర్ఎస్ పార్టీలను పాతరేయడం ఖాయమని కిషన్రెడ్డి అన్నారు.
©️ VIL Media Pvt Ltd. 2024-05-02T01:29:20Z dg43tfdfdgfd