కేసీఆర్ మానసిక పరిస్థితి బాగోలేదు.. చివరికి అతను కూడా సెలవు పెట్టాడట: సీఎం రేవంత్ రెడ్డి

మాజీ సీఎం కేసీఆర్ వ్యాఖ్యలను ఎవరూ సీరియస్‌గా తీసుకోవద్దని.. ప్రస్తుతం ఆయన మానసిక పరిస్థితి బాగోలేదని సీఎం రేవంత్ రెడ్డి సెటైర్లు వేశారు. హైదరాబాద్‌లోని తన నివాసంలో మీడియా సమావేశం నిర్వహించిన సీఎం రేవంత్ రెడ్డి.. కీలక వ్యాఖ్యలు చేశారు. అధికారం కోల్పోయాక కేసీఆర్‌కు ఇంటా బయట పరిస్థితులు అనుకూలంగా లేవని.. పిలిచినా ఎవరూ పలకడంలేదని, బెల్ కొట్టినా ఎవరూ రావడం లేదని.. చివరకు సంతోష్ కూడా సెలవుపెట్టిపోయాడంట అంటూ వ్యంగ్యాస్త్రాలు సంధించారు. మరోవైపు.. రాష్ట్రంలో సంచలనం సృష్టిస్తోన్న ఫోన్ ట్యాపింగ్ అంశంపై విచారణ కొనసాగుతోందని.. ఇలాంటి సమయంలో కేసు గురించి మాట్లాడటం భావ్యం కాదంటూ సీఎం తెలిపారు. అధికారులు పూర్తి నివేదిక ఇచ్చిన తర్వాతే ఆ కేసుపై మాట్లాడతానని రేవంత్ రెడ్డి స్పష్టం చేశారు.

ఇక.. మల్కాజ్‌గిరిలో బీజేపీ అభ్యర్థి గెలుస్తున్నాడని బీఆర్ఎస్ ఎమ్మెల్యే మల్లారెడ్డి బహిరంగంగా చెప్పి.. అలయ్ బలయ్ తీసుకున్నా ఆయనకు కనీసం షోకాజ్ నోటీసులు ఇవ్వటం కానీ.. పిలిచి ప్రశ్నించటం కానీ చేయటలేదని మండిపడ్డారు రేవంత్ రెడ్డి. బీజేపీతో నిజంగానే వైరం ఉంటే మల్లారెడ్డిని వెంటనే పార్టీ నుంచి సస్పెండ్ చేయాలని రేవంత్ రెడ్డి డిమాండ్ చేశారు. మహబూబ్‌నగర్‌లో భోజనం చేస్తుండగా రెండుసార్లు కరెంట్ పోయిందని కేసీఆర్ చేసిన ట్వీట్‌పై స్పందించిన రేవంత్ రెడ్డి.. కేసీఆర్ నువ్వు బకాసురుడివా..? ఎంత సేపు తింటావు..? అంటూ సెటైర్లు వేశారు.

మరోవైపు.. రిజర్వేషన్ రహిత దేశంగా మార్చేందుకు బీజేపీ కుట్ర చేస్తోందని, పార్లమెంట్ ఎన్నికల్లో ఏదోరకంగా 400 సీట్లు గెలిచి రాజ్యాంగ సూత్రం మీద దాడి చేయాలని ఆ పార్టీ నిర్ణయం తీసుకుందని సీఎం రేవంత్ రెడ్డి కీలక వ్యాఖ్యలు చేశారు. 2025 నాటికి ఆర్ఎస్ఎస్ స్థాపించి వందేళ్లు అవుతుందని.. ఆలోపు దేశంలో రిజర్వేషన్లు రద్దు చేసి హిందూ దేశంగా ప్రకటించాలన్నది వాళ్ల లక్ష్యమని రేవంత్ రెడ్డి ఆరోపించారు. రిజర్వేషన్లను రద్దు చేస్తామని అమిత్ షా వంటి బీజేపీ నేతలు తెలంగాణకే వచ్చి బహిరంగంగా చెబుతుంటే బీఆర్ఎస్ అధినేత కేసీఆర్ మాత్రం రిజర్వేషన్లు రద్దు చేసే కుట్రపై నోరు మెదపడం లేదన్నారు.

గతంలో కేసీఆర్ కూడా రాజ్యాంగాన్ని మార్చి రాయాలని చెప్పారని.. అదే ఆర్ఎస్ఎస్ విధానం కూడా అని రేవంత్ రెడ్డి ఆరోపించారు. కేసీఆర్ నిజంగా బీజేపీ విధానానికి ప్రభావితం అయ్యారా..? లేక జైల్లో ఉన్న బిడ్డకు బెయిల్ కోసం రిజర్వేషన్లను తాకట్టు పెట్టి బీజేపీకి సహకరిస్తున్నారా..? అంటూ కీలక వ్యాఖ్యలు చేశారు రేవంత్ రెడ్డి.

ఇటువంటి మరిన్ని వార్తలు సమయం తెలుగులో చదవండి. లేటెస్ట్ వార్తలు, సిటీ వార్తలు, జాతీయ వార్తలు, బిజినెస్ వార్తలు, క్రీడా వార్తలు, రాశిఫలాలు ఇంకా లైఫ్‌స్టైల్ అప్‌డేట్లు మొదలగునవి తెలుసుకోండి. వీడియోలను TimesXP లో చూడండి.

2024-04-27T16:32:59Z dg43tfdfdgfd