చేపల ముసుగులో గొడ్డు మాంసం తరలింపు.. ఏకంగా ట్రైన్‌లోనే, ఎంతకు తెగించార్రా..!
చేపల ముసుగులో గొడ్డు మాంసం తరలిస్తున్న ముఠాను రైల్వే పోలీసులు పట్టుకున్నారు. విశాఖ నుంచి హైదరాబాద్ లింగంపల్లి వెళ్తోన్న జన్మభూమి ఎక్స్ప్రెస్ ట్రైన్‌లో అక్రమంగా గొడ్డుమాంసం తరలిస్తుండగా.. నల్గొండ రైల్వే స్టేషన్‌లో పోలీసులు అదుపులోకి తీసుకున్నారు. వివరాల్లోకి వెళితే. విశాఖపట్నం నుంచి లింగంపల్లి వెళ్తున్న జన్మభూమి ఎక్స్ప్రెస్ ట్రైన్‌లో 80 గొడ్డు మాంసం బాక్సులను తరలించేందుకు ప్రయత్నం చేశారు. ట్రైన్‌లోని ముందు, వెనుక లగేజీ బోగీల్లో ఈ బాక్సులను లేబుల్ పేరిట తరలించడం కలకలం రేపింది. ఒక లగేజీ బోగీలో 40, మరో లగేజీ బోగీలో 40 బాక్సులను ఫిష్ లేబుల్ అంటించి సిమెంటు సంచులతో ప్యాక్ చేసి సికింద్రాబాద్ తరలిస్తున్నారు.
ఈ సమాచారం అందుకున్న ఏపీ బీజేపీ, ఆర్ఎస్ఎస్ నాయకులు తొలుత రాజమహేంద్రవరంలోనే అడ్డుకోవాలని చూసినా ప్రయత్నం విఫలమైంది. ఆ తర్వాత విజయవాడ రైల్వేస్టేషన్‌లోనూ ట్రైన్ ఆపేందుకు ప్రయత్నించారు. అయితే ఆర్పీఎఫ్ పోలీసులు వారిని వారించి.. జీఆర్పీ పోలీసులకు సమాచారం ఇవ్వాలని సూచించారు. దీంతో గుంటూరు రైల్వేస్టేషన్‌లో జీఆర్పీకి సమాచారం ఇచ్చారు. రైలు మధ్యాహ్నం ఒంటి గంట తర్వాత గుంటూరు రాగా అప్పటికే అక్కడికి తాళ్లాయపాలెం శైవక్షేత్రం పీఠాధిపతి శివస్వామి, పలువురు బీజేపీ, ఆర్ఎస్ఎస్, వీహెచ్‌పీ నాయకులు పెద్ద ఎత్తున చేరుకున్నారు.
ప్యాక్ చేసిన పార్సిల్ ఓపెన్ చేయాలని వారు ఆందోళకు దిగారు. ప్రస్తుతం చేపల వేటపై నిషేధం కొనసాగుతోందని.. అలాంటప్పుడు చేపలు ఎలా ఎగుమతి జరుగుతాయని వారు ప్రశ్నించారు. చేపల ముసుగులో గొడ్డు మాంసం తరలిస్తున్నారని పెద్ద ఎత్తున ఆందోళన చేపట్టారు. అయితే సీల్ ఓపెన్ చేయటానికి పోలీసులు అంగీకరించలేదు. ఈ క్రమంలో ఇరువర్గాల మధ్య వాగ్వాదం జరగ్గా.. ఆందోళన చేస్తున్న వారిని పోలీసులు పక్కకు లాగేశారు.
ఆ తర్వాత గుంటూరు నుంచి ట్రైన్ నల్గొండకు బయల్దేరగా.. ఇక్కడి రైల్వే పోలీసులకు (జీఆర్పీ) సమాచారం అందింది. దీంతో జీఆర్పీ పోలీసులు, సివిల్ పోలీసులు సంయుక్తంగా రంగంలోకి దిగి జన్మభూమి ఎక్స్ప్రెస్ నల్గొండ చేరుకోగా.. ట్రైన్‌లో తనిఖీలు నిర్వహించారు. ఇందులో ఫిష్ లేబుల్ ఉన్న ఒక బాక్సును తెరవగా.. లోపల గొడ్డు మాంసం కనిపించింది. దీంతో 80 బాక్సులను సీజ్ చేశారు. అయితే చేపల ముసుగులో అక్రమంగా గొడ్డు మాంసం తరలిస్తున్నది ఎవరైనే విషయంపై ఇంకా క్లారిటీ రావాల్సిఉంది. కేసు నమోదు చేసుకున్న పోలీసులు ప్రస్తుతం విచారణ చేపట్టారు.
ఇటువంటి మరిన్ని వార్తలు సమయం తెలుగులో చదవండి. లేటెస్ట్ వార్తలు, సిటీ వార్తలు, జాతీయ వార్తలు, బిజినెస్ వార్తలు, క్రీడా వార్తలు, రాశిఫలాలు ఇంకా లైఫ్‌స్టైల్ అప్‌డేట్లు మొదలగునవి తెలుసుకోండి. వీడియోలను TimesXP లో చూడండి. 2024-05-05T05:32:03Z dg43tfdfdgfd