సిటీ నేచర్ ఛాలెంజ్‌‌లో ఆసియాలోనే 'హైదరాబాద్‌' సెకండ్.. వరుసగా రెండోసారి..!

Hyderabad: హైదరాబాద్‌ అంటే ఓ మినీ ఇండియా అని చెప్తుంటారు. ఇక్కడ అన్ని రకాల వ్యక్తులు, అన్ని ప్రాంతాల ప్రజలకు నివాసయోగ్యమైన వైవిధ్యభరిత వాతావరణం ఉంటుంది. అందుకే.. హైదరాబాద్ నగరం అంటే ప్రత్యేక గుర్తింపు ఉంటుంది. ఈ క్రమంలోనే సిటీ నేచర్ ఛాలెంజ్- 2024లోనూ అగ్ర స్థానంలో నిలిచింది హైదరాబాద్ నగరం. ఏప్రిల్ 26 నుంచి 29 వరకు నాలుగు రోజుల పాటు నిర్వహించిన సిటీ నేచర్ ఛాలెంజ్-2024లో పాల్గొన్న ప్రపంచవ్యాప్తంగా ఉన్న నగరాలు, పట్టణాల్లో హైదరాబాద్ వరుసగా రెండోసారి టాప్‌లో నిలిచింది.

గతేడాది (2023) కూడా హైదరాబాద్ ఈ ఈవెంట్‌లో పాల్గొనటం ప్రారంభించింది. దేశంలో హైదరాబాద్ మొదటి స్థానంలో ఉండగా.. ఉత్తరాఖండ్‌లోని నానక్‌మట్ట రెండో స్థానంలో నిలిచింది. 670కి పైగా నగరాలు, పట్టణాలు వార్షిక గ్లోబల్ ఈవెంట్‌లో పాల్గొనగా.. హాంకాంగ్ తర్వాత ఆసియాలోనే హైదరాబాద్ రెండో స్థానంలో ఉండగా.. ప్రపంచంలో 13వ స్థానంలో ఉంది. లా పాజ్, బొలీవియా, మాంటెర్రీ మెక్సికో, శాన్ ఆంటోనియోలు ప్రపంచంలోని మొదటి మూడు స్థానాల్లో నిలిచాయి.

నాలుగు రోజుల కార్యక్రమంలో.. 527 మంది పరిశీలకులు వృక్షజాలం, జంతుజాలంతో సహా 2,092 జాతులను తనిఖీ చేశారు. ఈ పరిశీలకులు నాలుగు రోజుల్లో 34,388 పరిశీలనలు చేశారు. వేప చెట్టు (262), సేక్రెడ్ ఫిగ్ (135) మొక్కలు ఎక్కువగా ఉండగా.. నెమలి (206), రెడ్ వెంటెడ్ బుల్బుల్ అనే పక్షిజాతులు హైదరాబాద్‌లో ఎక్కువగా ఉన్నట్టు గమనించారు. అయితే.. ప్రపంచవ్యాప్తంగా ఉన్న పరిశీలకుల భాగస్వామ్యం గణనీయంగా పెరిగిందని పక్షి పరిశీలకుడు శ్రీరామ్ రెడ్డి తెలంగాణ టుడేతో అన్నారు. గతేడాది 350 మంది పాల్గొనగా ఈ ఏడాది 527 మందికి చేరినట్లు ఆయన తెలిపారు. గుర్తించబడిన జాతుల సంఖ్య గత సంవత్సరం 1,900 నుంచి 2,092కి పెరిగినందున పెరిగిన భాగస్వామ్యం ఫలితాల్లో ప్రతిబింబిస్తుందన్నారు.

సిటీ నేచర్ ఛాలెంజ్‌ను కాలిఫోర్నియా అకాడమీ ఆఫ్ సైన్సెస్‌కు చెందిన అలిసన్ యంగ్, రెబెక్కా జాన్సన్, లాస్ ఏంజిల్స్ కౌంటీలోని నేచురల్ హిస్టరీ మ్యూజియం యొక్క లీలా హిగ్గిన్స్ ప్రారంభించారు. ఈ పోటీ మొదట లాస్ ఏంజిల్స్, శాన్ ఫ్రాన్సిస్కోకు మాత్రమే పరిమితం కాగా.. ఇప్పుడు ప్రపంచంలోని ఇతర ప్రాంతాలకు విస్తరించింది. పట్టణ జీవవైవిధ్యాన్ని డాక్యుమెంట్ చేయటమే సిటీ నేచర్ ఛాలెంజ్ యొక్క లక్ష్యంగా నిర్వాహకులు పేర్కొన్నారు.

ఇటువంటి మరిన్ని వార్తలు సమయం తెలుగులో చదవండి. లేటెస్ట్ వార్తలు, సిటీ వార్తలు, జాతీయ వార్తలు, బిజినెస్ వార్తలు, క్రీడా వార్తలు, రాశిఫలాలు ఇంకా లైఫ్‌స్టైల్ అప్‌డేట్లు మొదలగునవి తెలుసుకోండి. వీడియోలను TimesXP లో చూడండి.

2024-05-09T13:17:05Z dg43tfdfdgfd